男女混宿多舊魚

一代睇下一代唔順眼,睇黎呢個係好難改變既歷史定律。睇到而家D大學生,訓街爭取男女混宿,真係覺得佢地冇野搵野黎搞,認真法國菜。

男女混宿為宿生製造左乜野唔方便,大把人講過,大把人諗到,唔駛我再講多次。

我更加唔係道德佬,呢件事道唔道德,我理Q佢咁多。

問題係:其實有冇必要搞呢次所謂「抗爭」呢?

活動口號係「直視大學生性慾,奪回宿舍性空間」。嘩,挑你,一睇以為返左一百年前見到寫緊《沉淪》果期既郁達夫!

問一個好簡單既問題:而家男女分宿,D人係咪就冇係HALL扑野先?你地D所謂「宿舍性空間」係咪真係冇到咁?

咪話大學生啦,而家中學生都係咁,呢樣野大家一早心照。不過就咁,呢D野大家眼不見為淨,寧俾人知莫俾人見,完全係服膺於水清則無魚既智慧。

而家事情之戇鳩,就係在於係冇問題處撩問題。

就好似你返工,老細講明工作時工作,唔俾匿係廁所打機,一經發現殺無赦。咁有朝一日你老人家關埋道門,痾緊屎——哦,sorry,而家興講「便便」——又未清得晒,心癮起,拿部iPhone出黎打返一兩鋪angry bird,你都唔會白痴到將個窩林校到100%,任由「嘻嘻嘻」既雀聲傳到成個廁所都知,你都醒爬識mute那左佢啦下話?你都唔會打到關關三星先捨得死返出去啦下話?

你適可而止,根本冇人會理,斷估你老細唔會癲到係每個廁格度裝部cam卦?

而家你同我講:你理得我打唔打丫,總之我要訓街抗議,誓要爭取「廁所遊戲空間」!

你話係咪痴撚線?

你唔好同我講HALL唔同公司呀。大學宿舍就代表乜春都得架啦?唔同既宿舍,就有唔同既制約、唔同既宿規。你唔妥佢?fine,你咪唔好住囉,而家邊個搵支槍指住你個頭迫你入去俾人壓抑你個「性空間」唧?大佬,你睇下歐洲好多youth hostel,除左已婚男女,唔少都係要男女分開訓架啦。

再講啦,後生仔得閒炒飯,太過光明正大你認為係好事咩?你睇下romeo and juliet,你睇下《西廂記》入面崔鶯鶯同張君瑞。偷偷摸摸,某程度上係年輕時期愛情其中一個浪漫點黎架,珍惜下啦傻仔。

成件事,出發點已經係好那多餘。呢兩位「行動發起人」既論調,就更加……自己睇:

以性先行, Andy認為宿規早有潛台詞,「不容許男女同宿,背後已是假設男女同宿會發生性行為,係規則先強調了性」。

他曾經以同性戀身份撰文,諷刺宿舍只容許同性同房,有如為同性戀者進行性行為,提供了方便,異性戀者卻享受不到同等「優待」,「男女通宵共處可以是做功課、看電影,甚至討論國家大事,但似乎這些都被禁」。

他們形容現時宿規獨裁,在諮詢會提出意見,往往不獲跟進,所以今次「瞓街」抗議。即將畢業的他們不期望「任內」爭取成功,只希望廣播種子,由下一代繼續爭取。

係啦係啦,咁分開男女廁夠係「規則先強調了性」、「為同性戀者進行性行為,提供了方便」啦,咁你入女廁抗議囉Andy仔。

挑,好心咪撚講到自己成個譚嗣同咁啦,year 3啦,俾心機寫好你既FYP先至搵你條仔 / 女「通宵共處」「看電影,甚至討論國家大事」啦。

好怕呢類花靚,人地訓街佢又學人訓街,人地激進佢又學人激進,但就學得笨笨柒柒咁。

唉,唯有講句,笨柒都係年輕人既特權囉。

廣告

對「男女混宿多舊魚」的一則回應

  1. 瞓街有輕於鴻毛,重於泰山,如果我係佢老母,見佢為「直視大學生性慾,奪回宿舍性空間」而瞓街,我會忍唔住話:「仆你個臭街!有書唔讀攪埋D無謂野,身為大學生,大把野好做唔做,剩係關注「性空間」,挑那媽!」

  2. 以性先行, Andy認為宿規早有潛台詞,「不容許男女同宿,背後已是假設男女同宿會發生性行為,係規則先強調了性」。

    咩人諗咩野就會入咩位

    點解佢地唔自己夾錢租個地方呢?
    到時喜歡有幾"混宿"就有幾"混宿", 可惜我只見到"混帳"
    大學生讀多左少少書就隨便挑戰社會道德標準?
    你地得到挑戰界權威三寶首肯未呀?

  3. Quote : 他曾經以同性戀身份撰文,諷刺宿舍只容許同性同房,有如為同性戀者進行性行為,提供了方便,異性戀者卻享受不到同等「優待」,「男女通宵共處可以是做功課、看電影,甚至討論國家大事,但似乎這些都被禁」。

    好好笑,點解男女共宿/男女分宿 嘅目的一定係以性為大前提?
    咁唔通男女分校嘅意義又係為左方便同性戀者?
    不知所謂的大學生

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google+ photo

您的留言將使用 Google+ 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s